கும்மிடிப்பூண்டி,
திருவள்ளூர் மாவட்டம் கும்மிடிப்பூண்டி அடுத்த சுண்ணாம்புகுளம் கிராமத்தில் வசித்து வந்தவர் ரவி (வயது 54). கொத்தனார். இவரது மனைவி வீரம்மாள்(43). மகன் பாலமுரளி(24), மகள் தேவயானி(20). ரவி குடும்பத்தினருக்கும் அவரது அண்ணன் சிவா(56) குடும்பத்தினருக்கும் இடையே சொத்து தகராறு காரணமாக முன்விரோதம் இருந்து வந்தது.
இந்தநிலையில், கடந்த சில நாட்களுக்கு முன்பாக சொத்து பிரச்சினை தொடர்பாக ரவியை அவரது அண்ணன் சிவாவும், அவரது கும்பத்தாரும் சேர்ந்து தாக்கியதாக கூறப்படுகிறது.
இந்தநிலையில், கடந்த 22-ம் தேதி முதல் ரவி தனது குடும்பத்தோடு மாயமாகி விட்டார். இது குறித்து ஆரம்பாக்கம் போலீசார் வழக்குப்பதிவு செய்து மாயமான ரவியையும், அவரது குடும்பத்தினரையும் தேடி வந்தனர்.
உடல்கள் கரை ஒதுங்கியது
இந்தநிலையில், பழவேற்காடு முகத்துவாரத்தில் ரவியின் மனைவி வீரம்மாள் மற்றும் அவரது மகள் தேவயானியின் உடல்கள் கரை ஒதுங்கியது. அவர்கள் 2 பேரும் தற்கொலை செய்து கொண்டிருக்கலாம் என்ற சந்தேகத்தில் திருப்பாலைவனம் போலீசார் விசாரித்து வருகின்றனர்.
இதனைத்தொடர்ந்து, மாயமான ரவியும், அவரது மகன் பாலமுரளியும் தற்கொலை செய்து கொண்டார்களா? அவர்களின் கதி என்ன? என்பது குறித்து போலீசார் விசாரணை நடத்தி வருகின்றனர்.
நேற்று முழுவதும் பழவேற்காடு முகத்துவாரத்தில் ரவியையும், அவரது மகன் பாலமுரளியையும் தொடர்ந்து மீனவர்கள் உதவியோடு தேடும் பணியை போலீசார் மேற்கொண்டனர்.
விசாரணை
ஆனால் நேற்று இரவு வரை எவ்வித தகவலும் கிடைக்கவில்லை. இன்றும் தேடுதல் வேட்டை தொடரும் என போலீசார் தரப்பில் தெரிவிக்கப்பட்டு உள்ளது.
மேலும், பழவேற்காடு ஏரியில் கரை ஒதுங்கிய தாய் வீரம்மாள் மற்றும் மகள் தேவயானி ஆகியோரின் உடல்கள் நேற்றுவரை பிரேத பரிசோதனை செய்யாததால், அவர்களின் உறவினர்களிடம் உடல்களை ஒப்படைக்க முடியாத நிலை ஏற்பட்டு உள்ளது.
இந்தநிலையில், சொத்து பிரச்சினையால் ரவியுடன் தகராறில் ஈடுபட்ட அவரது அண்ணன் சிவா மற்றும் அவரது மகன் அஜித் ஆகியோரை பிடித்து ஆரம்பாக்கம் போலீசார் விசாரணை நடத்தி வருகின்றனர்.
